六樓后座 DVD Region All

《六樓後座》—麥浚龍學湯．告魯斯做調酒師？

縱使我跟全香港的人都熟知麥浚龍(Juno)是誰，寫稿的時候又試過有人播【有人】，但他是做音樂的，我是做電影的，碰面的機會接近零。直至他參與電影《六樓後座》，兩條平行線才終於找到交匯點。

聽說你今次飾演的是一個bartender。
係呀，調酒是我的職業，我亦因為咁而識好多女仔。雖然套戲主角好多，我的角色唔會發展愛情線，但係就好睇得出我個人比較花弗，幾鍾意結識異性。另外，我仲有少少市儈，班朋友租了間屋(六樓後座)方便聚會，我就堅決唔交租，只係將酒水免費奉獻給他們就算。

有無特別為角色設計一些特別的眼神 / 動作去吸引女仔？
有動作！如果今次唔係做調酒師，我諗我呢一世都唔會接觸到好高超的拋樽技術。我的歌迷好好，紀錄片又好，電影又好都搵好多俾我參考，我翻睇最多次的是湯﹒告魯斯的《花心情聖》(Cocktail)，他飾演的也是一個調酒師。在現場，導演roll緊機拍其他演員，我就用個一個鐘去練，練完即刻拍，結果take了3個 take就攪掂，我自己都好意外！

最攪笑的係拍呢個shot，我要即場拋樽之外，仲要介紹酒名。拍之前我會問定現在最「啃」係邊隻酒，到時一路fing就一路講名。以前我都會同朋友落pub，但唔會點飲酒，因為我係一個好容易面紅的人！ 入行之後，有一次公司同我慶祝生日，我飲了一細杯紅酒就──嘩! 成塊面紅晒! 飲完就唔駛旨意做野。

你接到劇本的第一個反應係點？
我覺得個角色幾似我真人──唔係話識女仔個方面！(笑) 我唔係一個鍾意成群人出街的人，我自己比較鍾意留係屋企，就算拍唔拍拖都鍾意係屋企渡過。我似個角色係我真人都有少少市儈，我自己好鍾意睇漫畫，我去買漫畫個時都幾鍾意同人講價。就係呢個共通點，套戲我先決定接拍！

在「六樓後座」間屋，大部份角色會做D咩？
大家會玩一個Truth同Dare的遊戲。有兩樣?俾你揀，如果揀Truth，叫你講真話，你就一定要講；如果揀dare，你就要夠膽去做某D?。大家所講所做的都似返時下青少年的，當中會有少少咸濕野。我覺得青少年睇到會有共鳴，唔係話每個青少年都會跟住租間屋去玩，但他們的心裡都一定會覺得呢間屋係天堂！

有無一個角色是有歹角或者會有少少行差踏錯？
雖然每個人的性格都唔同，但都只係追求自己的理想，都幾正面，無話要炸呢度或者要殺人。

今次是黃真真執導的第一部劇情長片，跟她合作感受怎樣？
我之前有睇過她執導的《女人那話兒》，不過拍攝手法好唔同，個次係紀錄片。佢幾照顧演員、幾肯同人分享，唔會話劇本寫咩就去拍，佢會問大家:「你平日會唔會講呢句？」平時又會同大家玩得好埋。

你提到的《女人那話兒》涉及情慾內容，如果黃真真找你拍這類劇情片，你會接受嗎？
有人會因為歌手形象而唔會拍多元化的戲，我唔想有這件事發生。情慾又好，三級片四級片又好，只要劇本表達得好，係藝術唔係污穢，我絕對唔介意有這樣的犧牲。

Juno的局限在那裡？ 你最想/最唔想接那些戲種？
我覺得自己有根底去carry動作片。未入行之前，我有學自由搏擊，是真打，後來就跟了成家班一年半時間，學打筋斗、練拳腳同做反應，我有打人又有被人打，但都係就住?打。如果第日有機會拍動作片，我一家要自己上陣，呢個係對演戲的一份尊重。我以前的MV都係自己應付吊威也、爆炸、開槍和打架的場面。

我無咁鍾意的是打仗片及慘情片，一些有關絕症及殘缺人的電影。唔鍾意打仗片可能係同我反戰有少少關
係。我記得有一次電台為了宣揚反戰意識，就印了好多反戰T恤，但我質疑咁係咪有用？T恤俾其他人係咪好過俾香港人著？ 將呢個主題變成一個節目係咪失去了真正意義？ 我覺得香港人做好自己之餘，幫到那邊的人就盡量去幫反而仲好。唔鍾意睇慘情戲係我覺得如果你愛上一個人，然後發現佢有絕症，情節都會幾婆媽。我睇深情的愛情片都會被感動，但睇慘情片反而喊唔出。

相信你去過世界不同地方，有沒有特別的觀影經驗？
我記得有一次我去澳洲，戲院將三集《奪寶奇兵》接住一齊放映，我就連續睇了4、5個鐘。在日本睇戲的感覺又好唔同，因為始終坐在你周圍的是當地的人，你處身的是另外一個地方。我都有聽過朋友話某一些地區，可以俾人駛埋架車入去，入面有一個大銀幕播電影。不過俾我揀我都鍾意在香港睇戲，比較有親切感。未入行之前我都鍾意睇戲，尤其是舊片，我最鍾意《五福星》、《霸王花》系列及成龍的電影，我覺得呢個係香港人的驕傲，外國人咁崇拜香港動作片就係因為我們有獨特的功夫及拍法。不過現在入了娛樂圈，香港戲院我真係好耐無入過，我已經唔可以以普通人的身份入場，坐隔離的人會望你:「Juno都?睇戲﹗」「Juno買緊飛呀﹗」我諗現在情況好難可以返轉頭。不過《六樓後座》係我第一部電影，我都幾緊張，好想快D在大銀幕上睇返自己！

資料來源︰電影雙周刊 (撰文︰小白)