同盜一擊 (韓國版) DVD Region 3

《同盜一擊》—中國武術結合黑人Hip-Hop

身在中國為《英雄》埋尾的時候，李連杰收到監製祖．舒路華(Joel Silver)相隔幾萬里之外的電話：「我有套新片用返晒《致命英雄》(Romeo Must Die)的班底去拍，預埋你份啦！」回想當初祖．舒路華以及華納公司都有份引薦自己過來荷里活發展，所以李連杰爽快答了一句：「OK！」結果就這就促成了華人李連杰及黑人DMX主演的《同盜一擊》(Cradle 2 The Grave)，一套揚言「結合中國武術及黑人hip-hop音樂」的電影。

咩係同盜一擊?
監製祖．舒路華接受訪問時提到《同盜一擊》的故事好複雜，甚至唔可以撮要來講。雖然佢咁講有些誇張，不過戲中李連杰及DMX的關係真係唔係咁直線。扮演洛杉磯犯罪集團首腦的DMX，因為女兒被要脅作人質，所以要搶奪一批極罕見的珠寶作交換﹔與之同時，身份為聯邦密探的李連杰就奉命追緝案件的幕後黑手。處於黑白兩道的他們，雖然立場及動機不同，但因為有著同一個敵人，所以就一同「盜」寶「擊」敗歹徒，即是戲名《同盜一擊》。一個黃皮膚的人加一個黑人，好自然就會諗到《火拚時速》(Rush Hour)，不過除了之前所講，李連杰及DMX的關係似拍檔而非拍檔之外，《火拚時速》比較詼諧，但《同盜一擊》就比較cool。

故事重要過動作
對於衝出亞洲市場所拍攝的《猛龍戰警》(Kiss of the Dragon)、《最後一強》(The One)以及《致命英雄》都未稱得上「創出佳績」，李連杰淡然地說:「在外國拍戲，無論生產模式、資金、甚至市場的規模始終都比香港優勝。雖然那些作品受到批評，但我係信佛的，每部戲我已經盡力做得最好，結果我係唔會強求。」「有時電影會走錯方向，以為『動作電影』就等於『電影』有『動作』就得，其實『動作電影』都係『電影』，所以都要好故事，動作只係用來輔助角色。就係呢個原因導致某些電影成功，某些就失敗。不過在《同盜一擊》，我同武術指導元奎對動作的認知都係一樣，人物同故事都係重要過打鬥，就算要打，我地都會研究要打的人究竟係咩性格、處於咩環境，出手係因為想阻止某些行為、傷害人定係想殺人?」為配合角色的冷峻，今次李連杰的打法有一個獨特的Signature──就係用右手打，左手放入褲袋，不過當佢決心將某人送死的時候，左手都會幫埋手。

地下拳擊賽
有外國影評人睇完該片，表示「未見過咁terrific的李連杰」、又話電影「超暴力」，當中最具爭議性的一場戲係「地下搏擊比賽」。李連杰會在困獸籠裡面同15個自由搏擊手打到拳拳到肉，感覺跟街頭實戰相近，而當中有3個係真實的自由搏擊冠軍，一個係重量級，另外兩個係輕量級，而台下全是見唔到血唔罷休的觀眾。監製事後表示：「我成日同請返?的搏擊手講，我地只係拍戲，唔使咁用力，佢地話：『我地知自己做緊咩啦！』點知一roll機，佢地又打到boom boom聲！電影中的搏擊場面，唯一同現實唔同的地方就係被打的人會對住鏡頭展露自己的痛苦，但在現實生活中就要掩藏。」

網上徵對手
除了搏擊手之外，李連杰仲要對付由麥克．狄卡斯高斯(Mark Dacascos) ，一個曾經置他於死地，又綁架DMX女兒的壞份子。原來今次係李連杰的影迷促成兩人的合作。「我係我的個人網頁做調查，徵詢我的影迷，問佢地想我同邊個在銀幕上大打出手，佢地提議麥克．狄卡斯高斯。」想不到麥克．狄卡斯高斯原來亦是李連杰的影迷之一。「我自己四歲就練武，李連杰係我的偶像，我鍾意左佢17年，第一套睇佢的電影係《少林寺》。」

Hip-Hop 之王
之前提過《同盜一擊》結合了華人功夫及黑人hip hop，不過DMX的角色係黑幫首領，所以佢唔會在戲中無端端唱番兩嘴，但就為電影唱了三首背景歌曲。雖然DMX對香港人比較陌生，但其實佢係hip-hop界紅人，他出道只有兩年，但首三張唱片銷量已正迫1500萬張，成績驕人，其中一張大碟《Get At Me Dog》盡現他的街頭唱腔文化，令他受到世界關注。他亦是首位歌手能夠在同一年有兩張唱片登上榜首位置。繼《致命英雄》之後，《同盜一擊》是他跟李連杰第二次合作。對於角色，他曾經這樣說：「現實生活中我都有三個細路哥，所以我可以理解到如果佢地受到傷害，作為父親會有咩感覺。我盡量將個種憤怒、無望及痛苦代入角色當中。」

《同盜一擊》係李連杰最後一部「正常」動作片﹖
李連杰現在忙於拍攝法國導演路．比桑執導的《Danny the Dog》，據他透露:「計埋《最盜一擊》，我已經拍了40幾部電影。以前我多數係做英雄，唔係救人就救城市，但係《Danny the Dog》反而係由摩根．費曼救返我，因為套戲係講我好打得，但係完全唔知道生命的意義，係摩根．費曼教識我咩係『愛』。」

資料來源︰電影雙周刊—香港 (撰文：阿綠)