特務戇 J (VCD) (香港版) VCD

特務戇J戇豆先生上占士邦身﹖

皮雅斯．布士南肯定寢食難安，因為除了例牌玩串鐵金剛電影的《凸務之王》(Austin Powers)外，James Bond近日又多了個宿敵──James Bean! Bean者何人? 他就是我們熟悉的Mr. Bean路雲．艾堅遜(Rowan Atkinson)。在新片《特務戇J》(Johnny English)，這個曾經把頭塞進火雞的戇豆先生將會取代占士邦，肩負起拯救全世界的責任。

豆之報恩﹖
97年，應該是戇豆先生的熱潮推向最高峰的時刻，因為單是電影版本已經勁收二億三千萬美元。有說路雲．艾堅遜更游說電影公司不要將該片發行到意大利，因為全世界都有他的狂熱影迷，他只想保留一個地方可以讓他不受騷擾地遊覽。賺到盤滿砵滿的路雲．艾堅遜之後甚為「憐香惜肉」，除了玩票性質出現《Rat Race》及《狗狗震》(Scooby Doo)之外就鮮有露面。今次復出拍攝《特務戇J》其實是報知遇之恩。

第一身 :黑武士
未變身戇豆之前，路雲．艾堅遜曾經為BBC拍攝了三輯cult味甚重的電視片集《黑武士》(Blackadder)。不過此黑武士跟《星球大戰》的黑武士大纜都扯唔埋，他是英皇Richard四世的繼任人，日常嗜好係攬住羊仔睡覺。雖然劇集有好多笑位係要了解英國歷史同隱喻先笑得出，但路雲．艾堅遜不靠對白，齋靠身體語言的「戇豆」特徵已經開始成形。

第二身 :Richard Latham
91年英國信用卡公司Barclaycard因為《黑武士》觸發靈感，創作了同樣地位崇高，但撞板多過食飯的特務Richard Latham。他服務於軍方機密組織M17，因為一卡在手，所以每次闖禍都有賠償助他逢凶反吉。首輯廣告推出之後申請信用卡的人急升，而且廣告屢獲殊榮，因此卡公司再搵路雲．艾堅遜添食，點知一添就添足7年，一共拍了17個同系列的廣告。97年，當全世界都將路雲．艾堅遜等同係戇豆先生的時候，電影公司決意讓Richard Latham重出新天，將該角色由廣告升格到電影，而路雲．艾堅遜不但承諾演出，還表示要像「打地基」般，在構思劇本的階段就加入。

第三身 : 特務戇J
問題是Richard Latham點解無端端又改名做Johnny English? 路雲．艾堅遜解釋:「改名比較好！ Johnny個名比較易講易記。」「今次拍《特務戇J》係超高難度，因為笑話可以有成1000個咁多，但係電影唔同廣告片，你唔可以塞一兩個入去就算，你要有一條故事線將它們串連。呢套片係搵返《新鐵金剛之黑日危機》(The World is not Enough)的編劇執筆撰寫，論製作規模及格調亦似足占士邦片。我自己都好開心，因為我都係邦迷之一，我自己都演過《鐵金剛勇奪巡航導彈》(Never Say Never Again)。但論到惹笑效果，就應該歸類為《凸務之王》。戇豆先生同戇J先生好唔同，戇豆先生外表係成人，但骨子裡仲係細路仔思想，佢好自我中心，唔多理外界的規範，帶來好多麻煩仲樂在其中。我諗觀眾咁鍾意佢係因為佢做出好多大家想做又唔敢做的事。但係今次的戇J先生有些不同，佢好鍾意捲入複雜的事件當中，好似今次就係要拯救大英帝國，免淪為法國野心家的監牢，佢生活在幻想之中，想由Zero變Hero，可惜佢力不從心，所以次次出事都搏無人知。用比喻來講，戇J先生好似係參與跨欄比賽的人，佢好相信自己的能力，跨完第一個欄就開心過頭，猛向觀眾揮手，所以未到第二個欄就跣低。」今次扮戇J，唯一一件遺憾的事是一些飛車場面路雲．艾堅遜不能親自上陣。「我大學時是主修電子工程，對車對機器都好有研究。雖然我入了娛樂圈，但直至83年我的護照，職業一欄都係寫工程師，英國有本汽車雜誌叫【CAR】我都有幫過他們寫車評。《特務戇J》學足占士邦片，裡面有好多驚險的飛車場面，我當然想自己演返，但我見替身演完都話好驚，我仲邊有point向導演毛遂自薦。」

又關尊．麥高維治事﹖
《戇豆先生》除了路雲．艾堅遜之外，大家有印象的可能只係佢日日摟住的熊仔。不過到了《特務戇J》，佢唔駛再一個人唱獨腳戲，因為戲入面會有邦女郎翻版──J女郎，由澳洲新晉歌星妮妲妮．茵寶莉亞(Natalie Inbruglai)擔演，還有《玩謝麥哥維治》的尊．麥哥維治(John Malkovich)，不過今次輪到佢玩謝路雲．艾堅遜。戲中，尊．麥哥維治是來自法國的跨國企業家，正密謀奪取代表英國最高權力的皇冠，為的是實踐他征服世界的野心，但最後成功阻撓他的竟是特務人手不足，盲中中被推舉出來的戇J。尊．麥哥維治表示：「做喜劇我唔係第一次，不過以前多數係舞台劇，唔係電影。戲裡面我刻意扮到Camp Camp地，講英文又夾雜法國口音。個角色唔算好新鮮，但係同路雲．艾堅遜合作，我好振奮。看他的喜劇，大部份只識笑，但我就睇到更加多，佢其實係借角色的失敗、不足來引發笑料，所以角色都有他痛苦之處。」

資料來源︰電影雙周刊—香港 (撰文︰阿綠)