大丈夫 2 (美國版) DVD Region All

曾志偉毛舜筠 小男人小女人

阿毛(毛舜筠)話，佢同(曾)志偉其實唔係太家想象中咁熟。不過兩個人既火花，擦完一次又一次，現場攝影哥哥也感受得到，《大丈夫2》未上，已經期待兩人再次合作的可能性。

女人唔滾 男人唔緊?

曾：男人去滾，某程度就好像應酬一樣，所以好多時都冇犯罪感。但女性唔會逢場作戲，如果去得滾，一定是報復心態居多。」

毛：「男人有時實在太睇小女人了，低估身邊的女人。我細個時比較天真，以為大家真心相愛，男人點會不忠。不過到了某個年紀，聽到好多朋友話如果男人去滾唔話你知，其實已經好愛你了，咁道理又實在係令人覺得好無奈，於是有女人在無奈中就做。你地男人去滾，甚至外面有情人，唔通我地女人唔可以咩。其實都係因為男人忽略女人感受而造成。

曾：上集《大丈夫》講我地滾，今集輪到你地女人復仇，我地男人今次唔做賊而做臥底，俾你地女性贏番舖。拍戲的公式其實就係咁，弱者贏得最後勝利永遠最好睇，你地女人係弱者，我地上集又滾過了，今集就無謂咁大男人啦。

毛：你估現實中，女人真係好鍾意去滾咩? 其實我so far都認為女人係唔會好似男人咁，純粹為性而滾，我地女人其實精神上係一種高層次一的動物，如果冇心靈上的交流真係唔會隨便同其他男人上床的。

曾：係咩？但戲入面好多有關女人出去滾情節，好似都係base on好多你身邊圈子中知道真實個案喎，仲要誇張到出唔到街，你今次咁落力一齊搞呢個古仔，睇怕都出賣哂你朋友啦。

毛：哈哈，真係要好多謝身邊好多圈內圈外朋友提供相關資料，我地做人做咁多年，有時原來都依然會發現自己原來咁井底之蛙，有case真係聽完都唔咁相信，嘩！咁又得？咁都得呀？但我都淨係將小部份擺係《大丈夫2》入面，如果將咁多不同形式個案擺哂入去，其實可以再開四、五集，甚至電視劇形式都得。

曾：你真實個案又誇張又得人驚，有下次話實行開個恐怖系列都得喇!

點解有續集

曾：講開用恐怖系列的形式講男人女人，其實又唔係冇諗過，3年前《大丈夫》反應理想，我同阿彭(彭浩翔)都有傾過再拍類似題材既可能性，開幾次會，有眉目，又有諗過以歌舞片形式，拍套《如果．性》或古裝版《史密夫決戰史密妻》之類，都會幾有睇頭。不過佢又真係好忙，佢亦有自己其他更想搞project係手，我都明白。我原本都唔想將《大丈夫》拍續集，因為覺得做電影有成廿五年，開續集就好似諗唔到橋，好失威咁，唔係後來你突然之間殺出來話有料到，我真係未必會搞《大丈夫2》。」

毛：我都覺得係好機緣巧合，之前又唔係監製，又唔係編劇，係你無情情話有個講女人踢竇劇本會搵我做女主角，叫我過目睇，睇完我就即刻覺得自己原來有更多資料同經歷可以擺落去，淨係踢竇唔夠好玩，橫掂都知道一女人出去滾真實個案，加埋落去先夠勁嘛，於是搞搞就變我有份寫古仔，兼做埋監製了。」

曾：「雖然劇本都有另外既編劇幫你手，但老實講我又覺得你原來可以係一個好出色編劇， 初初聽你講話拍女人去滾，我真係覺得好heavy，心入面諗，得唔得？不過你又叻，平時聽你講都好有故事性，加上你係圈中群埋老友，好似李思棋果，講得衰真係一個二個都講野都好鬼『毒』啦，所以一望個劇本，就知邊對白係你寫既。」

毛：「我最滿足就係扭最後個Ending，Part真係我地女人心聲，(陳)小春話睇完都眼濕濕，我希望自己心聲真係可以令時下廿幾三十以上，又有婚姻經驗既女人有共鳴啦。」

大丈夫與小女人?

曾：何謂大丈夫，要視乎各人的觀點與角度，好顧家，好有成就既，或者都可以叫做大丈夫。至於小男人，做屍屍縮縮，成日唔見得光，或者就係我眼中小男人了，其實小男人與大丈夫只係一線之差，至於我係屬於邊一類呢，都好難講，我又唔係Perfect，不過講到對家庭既承擔、個人成就呢，我覺得自己都OK啦。

毛：係《大丈夫2》我帶住姊妹出去滾男人，有人或者會問其實我是否骨子裡好大女人，其實我絕對唔係，我甚至係好buy大男人主義的，我什麼都以家庭行先，背後Support住我老公，回到家裡就湊仔女煮飯。唔似得志偉你四圍走冇時停兼八足咁多爪。」

曾：咪以為我淨係識得工作乜都唔理，生兒育女既責任你估我唔知，唔係淨係搵錢俾佢地餵飽就算，如何教育仔女，幫佢地建立自己個人格，甚至事業，我為人父好有責任感。

毛：「可能我覺得男人就係比較對外，所以好多時都忽略屋企個女人的感受，我聽唔少女性朋友講，老公係房事上成日想要就要，搞到冇晒情趣。」

曾：男人都只不過係有時要操Fit返身上的機件而已，不過係有時就係唔肯花時間去了解女性。

毛：不過咁，房事要如魚得水，女人都有責任，又有朋友話，如果老公朝早send你一張心意卡，返工又無時無刻打電話你兩句，返到屋企女人自然容易做得投入。如果係咁，男人又會話，嘩咁鬼煩不如唔好做啦，你估仲係細個拍拖溝女咩....咁樣。有時中國人社會，女人始終有多少保守，房事前又可能要熄燈、沖涼、刷牙，搞到男人失去興緻都未定。但我咁講唔係代表男人滾係呀! 我只不過係想講，夫妻多溝通，思想與關係協調得好的話，我始終認為有外遇等不愉快事件，應該可以避免的。

曾：唔同時期，男人睇女人都唔同，廿幾歲時候，我地留意既可能係女人的樣貌、身材咁。現在就未必淨係呢幾樣，仲要睇下大家Friend唔Friend呀，精神上有冇溝通等，真係好重要。我好羨慕徐克與施南生呢一對，大家又做同一行，兩公婆創作、社交都掂，話題又可以一樣，對我來講咁關係係最難得。

毛：我老公會比較主張由我打理屋企的事務，我覺得so far我好滿意呢種相處的模式，同老公亦夾得好好。今次可以出來參與搞《大丈夫2》，有時間可以做下自己想做，我已經好滿足了，做完後，我都係會主力抽多些時間處理屋企的事，我大女11歲了，雖然未必要我下下睇住，不過我總希望囡囡有我陪住係身邊會比較好。唔似志偉，唔停咁不斷工作，成個娛樂大亨咁。

曾：話時話我都冇做導演好耐啦，我現在都係希望培育電影新人多，一係就搵番以前經典導演出來拍番戲，好似譚家明咁。做呢行咁多年，我其實鍾意為某一些Project起了個頭，然後放手讓後生一輩去搞，可以睇住事情發生，其實仲開心呀。不過咁樣就會成人俾人投訴話我做有頭冇尾囉。」

文/聶仁

資料來源︰電影雙周刊 (香港)